اصحى يا قلب كفاك اوهام, قووووووووى

أصحى ياقلب كفاك اوهام
وشد عزام
الطير الي اتريده مارام

كفاك سريب , ودير حبيب
جديد اينسيك التعذيب
الا حالك مهزوز عطيب
كثير ملام
امعوج ماعنده قوّام
امشوش صاير فيه لهيب
إيهاتي من لوع ومنضام
حياتك تمت شوق نحيب
ويومك تمه كيف العام
سريبك ماعنده تطبيب
الا نسية بودور انعام
نصيحه لكي يا الغضيب
اسمعني راني م العلاّم
اسمعني ولاتدير تكركيب
الطايح ماعنده ملزام

كفاك انواح
كفاك اتدور مع الارياح
الغالي متنعم مرتاح
انت همّك مالي الانسام
اتصدر فيه ف كل سماح
اتوزع ع الناقص والتام
ابقي ليلك هو الصباح
وعينك لا ترقد لا اتنام
وجيجك شاهر بيه وفاح
وحالك ماعنده سقّام
ركب للعالي فوق وطاح
اشّرتع ماليقو لمّام
ونادوله كل الي لاح
اصعب حالك واشتد ضلام

كفاك اجنون
كفاك اتناجي في مرهون
انسى زوله ضاوي الجبنون
اليوم بقى الغيرك ضمّام
مع غيرك داير واشون
وناسي زولك في الاحلام
اشقى بحالك محتاج لعون
وكل من شافك قال حرام
اتسخف حالاتك بالهون
عطيب وحتى هطيِّك دام
ان ردت القسمه سيب اضنون
وخلك من ماضي هدّام
انظر في حالك مهما ايكون
النسية مكفولة بأيام
أصحى ياقلب كفاك اوهام
وشد عزام
الزول الي اتريده مارام

للشاعر وليد الرملى